கல்முனை மாநகர சபையின் மாதாந்த சபை அமர்வு நேற்று இடம்பெற்ற போது, இது தொடர்பாக ஐக்கிய மக்கள் சுதந்திர முன்னணி உறுப்பினர் ஏ.எம்.றியாஸ் சமர்ப்பித்த பிரேரணை ஏகமனதாக நிறைவேற்றப்பட்டுள்ளது.
இதன் பிரகாரம் கல்முனை ஆதார வைத்தியசாலைக்கு முன்பாக மணற்சேனை நோக்கி செல்லும் பழைய கல்விக் கந்தோர் வீதியின் பெயரை டாக்டர் முருகேசுப்பிள்ளை வீதி என மாற்றுவதற்கு சபை அங்கீகாரம் வழங்கியுள்ளது.
இப் பிரேரணையை சமர்ப்பித்து உரையாற்றிய உறுப்பினர் ஏ.எம்.றியாஸ் கூறியதாவது,
"யாழ்ப்பாணத்தைப் பிறப்பிடமாகக் கொண்ட வைத்திய கலாநிதி முருகேசுப்பிள்ளை, வைத்திய சேவைக்காக கல்முனைக்கு வந்து நாற்பது வருடங்களுக்கு மேல் மிகச்சிறப்பாக பணியாற்றி மக்கள் மனங்களில் இடம்பிடித்துள்ளார்.
இக்காலப் பகுதியில் வெறும் வைத்திய சேவையுடன் நின்று விடாமல் சமூகப் பணிகளிலும் தமிழ்- முஸ்லிம் ஐக்கியத்திற்காகவும் அவர் பெரிதும் உழைத்து வந்துள்ளார். இதனால் அவர் கல்முனையின் சமாதானக் காவலனாகப் போற்றப்பட்டார்.
எல்லோரும் மிகவும் நம்பிக்கையுடன் வைத்தியத்திற்காக இவரை நாடிய போதிலும் பணத்திற்காக என்று பணியாற்றாமல் வறியவர்களுக்கு முற்றிலும் இலவசமாக வைத்திய சேவையை வழங்கிய ஒரு பெறுந்தகையாக இருந்தார்.
உண்மையில் மருத்துவ சேவைக்கு அவர் ஓர் உதாரண புருஷராகத் திகழ்ந்தார் என்றால் அது மிகையாகாது. அதற்காக இந்த கல்முனை மண் பெரும் விழா எடுத்து அவரை வாழும்போதே வாழ்த்தி கௌரவித்தி மகிழ்ந்துள்ளது.
இத்தகைய ஓர் உத்தமரை என்றும் நினைவுகூரும் வகையில் அவரது பெயரை மேற்படி வீதிக்கு சூட்டி மாநகர சபை கௌரவமளிக்க வேண்டும்" என்று வேண்டுகோள் விடுத்தார்.
முதல்வர் நிஸாம் காரியப்பர் உரையாற்றுகையில், "இப் பிராந்தியத்தில் தமிழ், முஸ்லிம் ஒற்றுமைக்காக அயராது உழைத்து வந்த டாக்டர் முருகேசுப்பிள்ளை, முஸ்லிம்களை மிகவும் நேசித்து வந்த ஒரு பெருமகனாவார். அவரது சேவைகள் என்றும் மறக்க முடியாதவை. ஆகையினால் அவரது பெயரை அவர் வாழ்ந்த வீதிக்கு சூட்டுவதற்கான இப்பிரேரணையை நான் பெரிதும் வரவேற்கின்றேன்" என்று குறிப்பிட்டார்.
0 facebook-blogger:
கருத்துரையிடுக